Қолыңызға ұстап отырған “Екінші шанс” кітабы менің жеке авторлығымда жазылған үшінші кітап, жалпы менің қатысым болған төртінші кітап. Ең бірінші “Екінші болма”, одан кейін “Бізге айтылмаған құпия” деген кітапты жаздық. Кейін серіктесім Мейірбек мырзамен бірге “Бизнес симфония” кітабын жазып шықтық. Мынау менің төртінші кітабым. Алғашқы кітабым “Екінші болма”-ны жазбас бұрын, өзімнің Instagram-дағы оқырмандарымды офлайн және онлайн форматта жинап, бірнеше тренинг өткіздім. Тренингте кітапқа арқау болатын тақырыптарды қозғадық. Бар ойым - кітапты шығармас бұрын аудиторияға қай тақырыптың өтетінін, қай тақырыптың өтпейтінін түсініп алу. Осы тренингтердің қорытындысында “Екінші болма” кітабының негізігі бөлігі дайын болған еді. Екінші кітабым “Бізге айтылмаған құпия”-ны жазғанда тренинг ұйымдастырудан бас тарттым. Себебі бұл кітап үлкен депрессиядан кейін жазылды.

Жалпы ақша тапқысы келіп жүрген адам аспанға қарап, жай ақша тілеп жатпайды. Ол белгілі бір әрекет ететіні анық. Кәсібі жоқ болса, кәсіп ашуға талпынады, болмаса, қызметкер болса, жұмыс іздейді, клиент табады дегендей - әйтеуір бір әрекет жасайды. Сұрақ мынада: “Жасап жатқан әрекетіңіз ақша әкеле ме, жоқ па?”. Көп жағдайда адам бір әрекет жасап жатады, процесске кіріп кетеді, сырттан қарасаң, уақыты жоқ, жұмыс жасап жүреді. Бірақ айдың соңына келгенде ақша жоқ. Себебі әрекет ақша әкеліп жатқан жоқ. Алдыңғы тарауларда ақша деген не, оны бізге кім береді деген сұрақтарға тоқталдық. Егер “бізге ақша клиент арқылы келеді” деген ойды түсінсек, осы клиентті алып келетін әрекеттерді іздеуге көшуіміз қажет. Ең өкініштісі, көбіміз осы ақша әкелетін әрекеттерді жасауда қиналып қаламыз. Оның себебі неде деп ойлайсыз? Түсінікті болу үшін мына схеманы сызып көрсетейін. Ақша табатын адам, ең алдымен, алдыңғы тарауда айтылған алтын әрекеттерді жасайды.